உலகத்தை காதலிக்கிறேன்

அன்பு விசாலமாகி
காதல் விலாசமாக - மலரும் .
உன்னுடனான நம் நட்பு .
இன்றோ , நாளையோ
வரும் நாட்களிலோ . . .

மலர்ந்த பின் - பூ
அழகுதான் - ஆனால்
பூவின் அத்தனை
அழகையும் உள்ளடக்கிய
இத்தருணத்தின் - மொட்டு
பேரழகு எனக்கு .


*******************************


மெல்லிய புள்ளியாய்
வளைந்து திரும்பும் .
தூரத்து பறவை
படபடத்து அடங்கும் .
நடைமேடை நிசப்தமாகும் .
உன்னை ரயிலேற்றி விட்டு
திரும்புகையில்
உணர்கிறேன் - தனிமையின் வலியை . . .


****************************************


நீ - என்னுள் சிறிதுசிறிதாக
கரையத் தொடங்கிய
பொழுதில் - தான்

நான்
முழுமையாக
உருவெடுக்கத் தொடங்கினேன் . . . .


****************************************


எத்தனையோ நாட்கள் . . .
எத்தனையோ சொற்கள் . . .
இன்னும்
முழுமையடையாமலேயே
இருக்கிறது .
உனக்குமட்டுமேயான
எனது கவிதை . . . . .


****************************************


உலகின் அனைத்து ஜீவன்களின் மீதும்
நான் பிரியமாயிருக்க
உன் ஒருத்தியின் அன்பு மட்டுமே
போதுமானதாயிருக்கிறது .


****************************************


என்னிடமிருந்து
கண்ணீரை மட்டுமே
எடுத்துக்கொண்டு - அதை
அன்பாய் பரிமாற்றம் செய்ய
உன்னால் மட்டுமே சாத்தியம் .


****************************************


நீ என்னுடன் இல்லாத
தருணங்களில் மட்டுமே
உன்னை எண்ணிப் பார்க்கிறேன் .
நீ இல்லாமலேயே
போய்விட்டபிறகு . . . .


****************************************


உன்னை விடவும்
உனது பிரிவு
எனக்கு பிடித்தமானதாயிருக்கிறது .


****************************************


பல நாட்கள் முயன்றும்
உன்னிடமிருந்து
எதையும் பெறமுடியவில்லையே
என வருத்தத்திலிருந்தேன் .

இறுதியில் கிடைத்தது .

ஒரு சில அபத்தக் கவிதைகளும் ,
'' நாயே . . உருப்படுற வழியைப் பார் . . ''
- என்ற வாழ்த்தும் .


****************************************